खरपुंडी हे गाव गडचिरोली शहरापासून सुमारे ६.१ कि.मी. अंतरावर वसलेले असून हे गाव आपल्या स्वच्छतेसाठी, लोकसहभागासाठी आणि विकासाभिमुख उपक्रमांसाठी प्रसिद्ध आहे. गावाची लोकसंख्या सुमारे २१७३ असून त्यापैकी पुरुष १०७८ व स्त्रिया १०९५ इतक्या आहेत. खरपुंडी हे ग्रामपंचायतीच्या कार्यकुशलतेमुळे आणि नागरिकांच्या सक्रिय सहभागामुळे तालुक्यात एक आदर्श ग्रामपंचायत म्हणून ओळखले जाते. ग्रामपंचायत खरपुंडीने स्वच्छता, पर्यावरण संवर्धन, आरोग्य व ग्रामविकास या क्षेत्रांत उल्लेखनीय कार्य केले आहे. गावाने संत गाडगेबाबा स्वच्छता अभियानात सहभाग घेऊन स्वच्छता राखण्यात आदर्श निर्माण केला आहे. गावातील प्रत्येक कुटुंब शौचालयसंपन्न असून गाव हागणदारीमुक्त (ODF+) घोषित झाले आहे. गावात घनकचरा आणि सांडपाण्याचे व्यवस्थापन अत्यंत प्रभावी पद्धतीने केले जाते. घराघरातून ओला आणि सुका कचरा वेगळा गोळा केला जातो, तसेच ग्रामपंचायतीकडून नियमितपणे कचरा संकलन गाडी चालवली जाते.